Tuesday, April 24, 2012

भ्याट छल्नेको जरिवाना बिबरणमात्र सार्वजनिक

करिव एक बर्ष लगाएर नक्कली भ्याट बिल प्रयोग गर्नेमाथि छानविन गरेको सरकारले उनीहरुको सूची सार्वजनिक नगरि जरिवानाको कुल रकममात्र सार्वजनिक गरेको छ ।
आइतवार अर्थ मन्त्रालयले नक्कली भ्याट बिलमार्फत राजश्व छलेको अभियोगमा ५ सय १८ फर्मबाट असुल्न ६ अर्ब ६० करोड रुपैयाँ कर निर्धारण गरेको जानकारी दिएपनि कुन कुन कम्पनीले कति भ्याट छलेका थिए र उनीहरुलाई कति कति जरिवाना गरियो भन्ने खुलाइएन् ।
अर्थमन्त्री बर्षमान पुनले कर छल्नेहरुको नाम सार्वजनिक गर्न कानुनले नै नमिल्ने दावी गर्नुभयो । ‘मैले सोधेको पनि छैन । कानुनअनुसार करअधिकृत बाहेक अन्यलाई जानकारी दिन पनि आवश्यक छैन ।’ सार्वजनिक लेखा समिति, राष्ट्रिय सूचना आयोग लगायतका निकायले कर छल्नेहरुको बिबरण सार्वजनिक गर्न सरकारलाई निर्देशन दिएपनि नक्कली नोट छापे बराबरको अपराध गर्ने भ्याटमारा अपराधीको बिबरण सार्वजनिक गर्न सरकारले आनाकानी गर्दै आएको छ ।
बिभिन्न दलसँग निकट सम्बन्ध भएका ठूला घरानाहरु नै नक्कली भ्याट बिल काण्डमा संलग्न भएका कारण राजनीतिक दबाबका आधारमा उनीहरुको बिबरण सार्वजनिक नगरिएको हो । पत्रकार सम्मेलनमा मन्त्री पुनले कर छल्नेमाथि कारवाही गर्ने प्रतिबद्धता जनाउनु भयो । उहाँले भन्नुभयो-’कर छल्नेहरु हेर्दा सभासद, व्यवसायी, सामाजिक कार्यकर्ताभन्दा पनि हामीले करदाताको रुपमा हेरेका छौं ।’
६ अर्ब ६० करोड रुपैयाँ कर निर्धारण
झन्डै एक वर्षदेखि अनुसन्धान गरिरहेको आन्तरिक राजस्व विभागले चैत मसान्तसम्म सबै र्फमको कर जरिवाना निर्धारण गरेर आइतबार सार्वजनिक गरेको हो । ५ सय १८ र्फमको छानवीन गर्दा ३ अर्ब ६ करोड भ्याट, ३ अर्ब ३२ करोड आयकर र २० करोड ५२ लाख अन्तशुल्क गरी ६ अर्ब ५९ करोड ७७ लाख कर निर्धारण गरेको हो ।
कर नतिर्नेलाई विदेश जान रोक लगाइने, बैंक खाता रोक्का गरिने, निकासी रोक्का गरेर असुल गर्ने आन्तरिक राजस्व विभागका महानिर्देशक टंकमणि शर्माले जानकारी दिनुभयो ।
राष्ट्रिय सूचना आयोगले सूचनाको हकसम्बन्धी कानुनका आधारमा निर्देशन दिएपछि सरकारले नक्कली भ्याट बिल प्रयोग गर्ने ठूला व्यापारिक घरानासहितका ४ सय ३७ व्यापारिक र्फमको नाम गत कात्तिकमा सार्वजनिक गरेको थियो । जसमा चौधरी ग्रुप, गोल्छा अर्गनाइजेसन, जगदम्बा, दुगड, भाटभटेनी सुपरमार्केटजस्ता प्रतिष्ठित र बढी राजस्व तिर्ने समूहअन्तर्गतका व्यावसायिक फर्मसमेत छन् ।

राजश्व छली गर्नेहरुको विवरण ७ दिन भित्र सार्वजनिक

व्यवस्थापिका संसदको सार्वजनिक लेखा समितिले नक्कली भ्याट बिलको प्रयोग गरी राजश्व छली गर्नेहरुको विवरण ७ दिन भित्र सार्वजनिक गर्न निर्देशन दिएको छ ।
समितिको मंगलबार बसेको समितिको बैठकले भ्याट छल्नेहरुको विवरण सार्वजनिक गर्न अर्थ मन्त्रालयलाई निर्देशन दिएको सभापति रामकृष्ण यादवले जानकारी दिनुभयो । मन्त्रालयले वैशाख ३ गते भ्याट छलेको अभियोगमा ५ सय १८ र्फमबाट ६ सय ६० अर्ब रुपैयाँ कर निर्धारण गरेको बताएपछि भ्याट छली गर्ने र्फमहरुको नाम, उनीहरुले छलि गरेको भ्याट र तोकिएको जरिवाना लुकाएको थियो ।
लेखा समितिले भ्याट छलीका घटना दोहोरिन नदिन र भ्याट छलीको अनुसन्धानमा संलग्न कर्मचारीहरुलाई मुद्धा हेर्ने कार्यालयमा सरुवा नगर्न पनि सरकारलाई भनेको छ ।
बैठकले सामाजिक सुरक्षाका लागि विनियोजित रकम अन्यत्र नसार्न अर्थ मन्त्रालयलगायत सबै मन्त्रालयलाई निर्देशन पनि दिएको छ । चालु आर्थिक वर्षको बजेट निकासा खर्च र रकमान्तरको मन्त्रालयगत विवरण वैशाख २० गतेभित्र समितिमा पठाउन पनि अर्थ मन्त्रालयलाई निर्देशन दिएको छ ।

ट्राफिक महाशाखामा छापा

प्रहरी महानिरीक्षक रविन्द्रप्रताप शाहले महानगरीय प्रहरी ट्राफिक महाशाखाको दैनिक गतिविधिबारे गुनासो आएकाले प्रधान कार्यालयले 'अनुगमन' गरेको बताएका छन्।'कार्यशैलीप्रति गुनासो आएकाले अनुगमन सुरु गरेका हौं,' शाहले नागरिकसँग भने,

प्रधान कार्यालयले ट्राफिक महाशाखा र मातहत युनिटले आर्थिक अनियमितता गरेको सूचना पाएपछि ट्राफिक निर्देशनालयमार्फत टोली नै गठन गरेर बिहीबारबाट ट्राफिक कार्यालयहरूमा छापा मारेको थियो। टोलीले महाशाखाको बग्गीखाना केन्द्रीय कार्यालयदेखि वडास्तरका ट्राफिक प्रभागहरुमा छापा मारेर नगदी रसिद, जरिवानाको विवरणलगायत महत्त्वपूर्ण कागजपत्र नियन्त्रणमा लिइरहेको छ।
यातायात व्यवस्था विभागले सवारी नियम पालना नगर्नेलाई ट्राफिक प्रहरीले २ सय रुपैयाँसम्म जरिवाना लिन पाउने नियम रहेकोमा हालै बढाएर एक हजार रुपैयाँसम्म लिन पाउने अधिकार दिएको थियो। अधिकार प्रत्यायोजन गर्दा यातायातले सही उपयोग नभए फिर्ता गर्न सकिने सर्त राखेको छ।
अधिकार व्यवस्थापन र नयाँ प्रणाली विकास गरी आर्थिक पारदर्शिता कायम गर्नु अनुगमनको लक्ष्य रहेको आइजिपी शाहले बताए। उनले टोलीलाई ट्राफिक गतिविधिबारे अनुसन्धान गरी प्रतिवेदन दिने जिम्मेवारी तोकिएको जानकारी दिँदै भने, 'यदि कुनै गलत काम भएको देखिए प्रतिवेदनअनुसार कारबाही हुन्छ।'
वैशाख ८ गते गठन भएको तीन सदस्यीय टोलीले बिहीबार बेलुका ट्राफिक प्रहरी महाशाखाको केन्द्रमा छापा मारेर नगदी रसिद र राजस्व संकलन तथा दाखिलाको विवरण कब्जामा लिएको थियो।
टोलीले कार्यविभाग र महानगरीय प्रहरी आयुक्त कार्यालयको जनशक्तिसमेत परिचालन गरेर ट्राफिक वृत्त र प्रभागहरुमा छापा मारेको हो। महाशाखाको निर्देशनअनुसार मापसेबापत जरिवानामा अनियमितता भएको, एकै नम्बरका नगदी रसिदहरुको प्रयोग पटकपटक गरेको, विभिन्न वृत्त र प्रभागबाट संकलन भएका राजस्व दाखिलामा गडबडी भएको उजुरी बढेपछि प्रधान कार्यालयले आफू मातहतकै कार्यालयमा छापा मार्न थालेको स्रोतको भनाइ छ।
इकाइप्रमुखहरुसँग महाशाखाका अधिकारीले मासिक रकम माग गर्ने गरेको आन्तरिक गुनासो बढेकाले त्यसलाई समेत छानबिनको विषय बनाइने प्रधान कार्यालयस्रोतले बतायो।
प्रहरीमा यसअघि कुनै एक कार्यालयमा छड्के अनुगमन गरिए पनि एउटा क्षेत्रअन्तर्गत सबै कार्यालयमा यसरी छापा मारिएको थिएन। चार वर्षजति अघि प्रधान कार्यालयलले दरबारमार्ग प्रभागमा छापा मारेर तत्कालीन प्रमुखले लिएको ५० हजार घुस रकम बरामद गरेको थियो।
महाशाखाका अधिकारीले नक्कली रसिद प्रयोग गर्ने, सवारीचालक अनुमतिपत्र वितरणमा अनियमितता गरेको, आर्थिक गतिविधि र सरुवामा आर्थिक चलखेल हुने गरेको विवरण प्रधान कार्यालयले पाएपछि शाहको निर्देशनमा बिहीबारबाट ट्राफिक महानिर्देशनालयले एसएसपी रणबहादुर चन्दको टोली अनुगमनमा खटाएको हो।
प्रहरी प्रवक्ता विनोद सिंहले ट्राफिक महाशाखाको कार्यप्रणालीलाई आधुनिकीकरण गर्ने र जरिवाना संकलन र रकम दाखिलालाई व्यवस्थित गर्न प्रधान कार्यालयले काम सुरु गरेको जनाए। महाशाखाको प्रणाली सुधार गर्न गरिएको अनुगमन प्रतिवेदन सार्वजनिक गरिने सिंहले जानकारी दिए।

होसियार छाउछाउ नाखानुस !

  गत शुक्रबार चाउचाउ खाएपछि  दिक्तेल ४ की दिलमाया आचार्य र अर्की जानुका आचार्यको एकाएक बेहोस भएका थिए /  बेहोस भएका खोटाङका दुई किशोरीलाई थप उपचारका लागि मंगलबार हेलिकोप्टरमार्फत काठमाडौं लगिएको छ। स्वास्थ्यमा सुधार नभएपछि राजधानी रेफर गरिएको जिल्ला अस्पताल दिक्तेलले जनाएको छ। प्रतिगोटा १५ रुपैयाका दरले किनेर खाएको चाउचाउले १६ वर्षीया दिलमाया र जानुका बेहास् भएपछि भोलिपल्टदेखि दिक्तेलमा उपचार गराइरहेका थिए। तर, निको हुन्छ भन्दाभन्दै झन् झन् विरामी बढ्दै गएपछि थप उपचारका लागि काठमाडौ लानुपरेको दिलमायाका बाबु अग्निप्रसादले बताए।